Espertando Vocacións Científicas é o nome do proxecto de aprendizaxe e servizo que o Departamento de Ciencias puxo en marcha este curso e que xira en torno ao Día Internacional da Muller e a Nena na Ciencia #11f que celebramos no colexio os pasados 5 e 6 de febreiro.
Este proxecto inspirador pretendeu mobilizar ao alumnado de todas as etapas educativas, cun foco especial no alumnado de ESO, que asumiu un papel clave na organización de variadas actividades para os compañeiros e compañeiras de Primaria e Infantil.
Desde escenificacións teatrais que destacan as contribucións de mulleres científicas de todos os tempos, ata experimentos sinxelos que fomentan a participación activa, o noso colexio converteuse nun viveiro de entusiasmo científico. Tamén se expuxeron investigacións realizadas por científicas contemporáneas, achegando a investigación científica ao noso día a día.
Para inspirar a nova xeración, recibimos a catro científicas de renome: María García Portela, Cintia Folguiera Cobos, Lourdes Lorenzo García e Patricia Argerey Vilar. Ofreceron charlas co alumnado de ESO, compartindo as súas experiencias e motivando futuras vocacións científicas. O punto culminante tivo lugar o martes 6 de febreiro, cando o alumnado de 2º ESO participou nunha mesa redonda con nais científicas do colexio. Unha oportunidade única para conectarse coas historias inspiradoras das mulleres que non só destacan no ámbito científico, senón tamén como nais e profesionais comprometidas coa súa comunidade educativa.
Esta celebración non só conmemora a contribución das mulleres na ciencia, senón que tamén sembra as sementes do interese e admiración pola investigación científica entre as futuras xeracións.
