Como todos os anos, vivimos un día de celebración no colexio no chamado «Día Montagne», lembrando ao xove que inspirou a San Marcelino Champagnat a crear o Instituto Marista no ano 1817. Alumnos das distintas etapas do colexio estreitaron lazos para compartir o noso compromiso de solidariedade cos «Montagne» de hoxe, aqueles compañeiros e compañeiras, alumnos ou alumnas que temos máis cerca e están pasando por un mal momento. Enlazando co lema do curso «Sorrí de corazón», entre todos formamos como símbolo un sorriso repleto de frases de ánimo e optimismo coas que pretendemos xerar acompañamento e apoio a aqueles que o precisan agora ou en calquera outro momento do curso.
